Bitte, lieber in hochdeutsch.

Raad un Verwalten van d´ Stadt Emden hebben 2008 de Anregen van de Oostfreeske Landskupp upgrepen un hebben mit Heike Dirksen ´n Plattdüütskbeupdraggte benömt. Siet 2020 word hör van Hannelore Spannhoff unner d´ Arms grepen. 

Upgaav van de Plattdütskbeupdraggten is, up Fragen van de Börgerskes un Börgers intogahn, dat Umsetten van de Europäisk Sprakencharta vörantodrieven un de plattdütske Spraak bi d’ Arbeid to stönen.

De Europäisk Charta för minner bruukt Spraken sücht vör, dat elke Minsk dat Recht hett, sien Anliggen tegenover Amten up Plattdütsk vörtodragen un ok van en Mitarbeiderske of Mitarbeider in disse Spraak bedeent worden sall. Dat sall helpen, dat mehr un mehr Minsken Plattdüütsk proten of tominst verstahn. Anners lopen wi Gefahr, dat uns kulturell Arvgood, de plattdüütske Spraak, utstarven deit. 

Froo Dirksen hett Plattdüütsk van hör Grootollen lehrt un ok Froo Spannhoff is mit Plattdüütsk upwussen. Beid beleven in hör Olldag in de Umgang mit Kollegen, Börgerskes un Börgers un in hör Familien de Vördelen van de Tweesprakigheid. Hauptupgaav van Froo Spannhoff is de Uppass för dat Ideen- un Beswaarmanagement bi d´ Stadt Emden. Se kann marken, dat jüüst hier Plattproten för ´n Bült Kunnen mackelker is un dat Plattproters daarmit mehr Totrauen hebben. 

Wi ropen daarum all Börgerskes un Börgers daarto up, mehr Plattdüütsk to proten, ok wenn se mit Amten to doon hebben. Un dat Proten mutt ok neet in all Delen korrekt wesen, wi freien uns over elk un een, de Platt lernen will un ok deit. Doon deit lehren!

De Mitarbeiderskes un Mitarbeiters van de Stadt Emden – so as se dat könen – antwoorden geern up Platt!

Weitere Informationen

Europäische Charta für Regional- und Minderheitensprachen 

Ostfriesische Landschaft

Plattdüütsk-Hoogdüütsk Woordenbook

Ostfreeske Taal

Platt-Lern-App: PlattinO (De kann man in de Stores van Apple un Google runnerladen!)